ЖАЗАСЫН ӨТЕГЕНДЕР ЖҰМЫСҚА ТАРТЫЛМАҚ
Қалалық жұмыспен қамту және әлеуметтік бағдарламалар бөлімінде «Қылмыстық жазасын өтеген адамдарды әлеуметтік бейімдеу мен оңалту орталығы» жұмыс жасайды. Орталық қателікке жол беріп, қадамын шалыс басқан адамдарды еңбекпен қамтып және пробация қызметінің есебінде тұрған адамдарға әлеуметтік құқықтық көмек көрсетуді мақсат етеді. Осыған орай қалада тиісті сала мамандарының қатысуымен «Бос жұмыс орындары» жәрмеңкесі өткізілді. Оған пробация есебінде тұрған 15 адам қатысқан. Нәтижесінде 4 адамға еңбекке орналасу жөнінде жолдама және 5 адамға қайта даярлау курсына оқуға тіркелуге мүмкіндік берілді.
Түзеу мекемесінен босап шыққан адамдар құқық қорғау органдарының бейімдеу орталығында бақылауда болады. Оларды қоғамға бейімдеу жеңіл іс емес. Сала мамандары ол адамдарға медициналық және өзге де қызметтер көрсетіліп, арнайы бөлінетін жеңілдік бойынша қоғамдық жұмыстарға орналастыру мәселесіне көңіл бөлетінін айтады.
Таңшолпан КЕНЖЕБАЕВА,
ҚМУ-дің IV курс студенті.
