ЭЛЕКТРОНДЫ ДЕКЛАРАЦИЯЛАУ ҚОЛДАНЫСҚА ЕНДІ
Облыстық мемлекеттік кірістер департаментінде 2017 жылы көрсетілген мемлекеттік қызметтің 89 пайызы электронды түрде тапсырылған. Бұл 2016 жылғы көрсеткіштен 7,7 пайызға артық. Бұл жөнінде өңірлік коммуникациялар қызметінде өткен баспасөз мәслихатында департамент басшысы Серік Мұстафаев айтып өтті.
Үстіміздегі жылдың 1 қаңтарынан бастап «электронды декларациялау» тәртібі қолданыста. Мемлекеттік кірістер бағытында ақпараттық жүйе экспорт бағыты бойынша іске қосылған.
– Жаңа жүйе бүкіләлемдік сауда ұйымының талаптарына және еліміз мен Еуразиялық экономикалық одақтың жаңа кеден заңнамасына сәйкес сауданы жеңілдету мақсатында жасалған. Электронды декларациялау деректерді толықтай кодпен цифрландырады. Кедендік салықтар мен төлемдерді автоматты түрде есептеп, өндіруді жүзеге асырады. Жүйені енгізудегі мақсат – мемлекеттік кірістер органдары тарапынан жүргізілетін қызмет түрлерін барынша оңтайландыру, тұрақты түрде жетілдіру, сол арқылы бизнеске қолайлы жағдай жасау, – деді департамент басшысы.
Электронды жүйе арқылы декларацияланы өңдеу мен шығаруға 1 минутқа жуық уақыт кетеді. Көп функционалды жүйе кезең-кезеңімен енгізіледі. Сәуір айынан импорт режимі де электронды форматқа ауысады.
А.БАТЫРБАЙҚЫЗЫ.
