100 ЖАҢА ОҚУЛЫҚТЫҢ ЭЛЕКТРОНДЫ НҰСҚАСЫ ЖАРИЯЛАНДЫ
"Рухани жаңғыру" бағдарламасы негізінде «Жаңа гуманитарлық білім. Қазақ тіліндегі 100 жаңа оқулық» жобасы жүзеге асып, әлемнің белді университеттерінде пайдаланылатын гуманитарлық бағыттағы 100 кітап аударыла бастағаны мәлім. Биылғы 12 сәуірде кітаптардың алғашқы легі дайын болып, 18 түрлі оқулық көпшілікке таныстырылды. Бұл – Елбасы Нұрсұлтан Назарбаевтың бастамасымен жүзеге асырылып жатқан жоба. Елбасы өзінің «Болашаққа бағдар: рухани жаңғыру» бағдарламалық мақаласында әлемнің ең мықты ғалымдарының үздік оқулықтарын қазақ тіліне аударып, оны отандық оқу орындар бағдарламасына енгізуді тапсырған болатын. Елбасы өз сөзінде: «Жастарымыз жоғары ғылыми стандарттарға сәйкес білім алуға тиіс. Сондықтан біз 800 кітаптан тұратын үздік оқулықтардың ауқымды тізімін әзірледік. Ұлттық аударма бюросы құрылып, жұмысына кірісті. Жаңа оқулықтар – эксклюзивті гуманитарлық кітапхана. Бұл оқулықтар көпшілік үшін кітап түрінде, электрондық онлайн нұсқасында және үздік лекторлардың ашық дәрістерінің видеотекасы сияқты үш форматта қолжетімді болмақ.
Кітаптар латын қарпінде басып шығарылғаннан кейін, оларды шетелде тұратын жастарымыз да оқи алады», – деген болатын. Жаңа кітаптар баспадан шығып өткен айда кітапханаларға таратылды.
Ең бастысы, енді жаңа оқулықтардың электронды нұсқасы қолжетімді болып отыр.
