ҮГІТ БРИГАДАЛАРЫНЫҢ ЖАҢА ҚЫРЫ
А.Тоқмағамбетов атындағы қалалық мәдениет үйінде Елбасы Нұрсұлтан Назарбаевтың Қазақстан халқына Жолдауын және «Болашаққа бағдар: рухани жаңғыру» бағдарламасын насихаттауға арналған мәдени-үгіт бригадаларының облыстық байқауы өткізілді.
Аталмыш шарада облыстық мәдениет, архивтер және құжаттама басқармасының басшысы Мира Әбуова қатысушыларға сәттілік пен жеңіс тіледі. Облыстық халық шығармашылығын дамыту және мәдени-продюсерлік орталығының ұйымдастыруымен өткен байқауға 7 команда қатысты.
Елбасы сарабдал саясатын мәдени-үгіт бригадалары өз деңгейінде көрсете білді. Жолдаудың басты бағыттарын жан-жақты түсіндірілді.
– Облыстық байқауға осыған дейін аудандық сайыстарда жақсы өнер көрсеткен үгіт бригадалары іріктеліп алынды. Өзім Қармақшы аудандық мәдениет үйі жанынан құрылған «Өрлеу» тобының құрамында қатысып отырмын. Біздің тобымыз да ақтық байқауға жоғары дәрежеде дайындалып, өздерінің сценарийін құруда ертегі, пьеса, мюзикл, әдеби шығармалар желісіне сүйене отырып, танымал әуендерді, хореографиялық, вокалды, театрландырылған қойылымдарды пайдаланды, – дейді байқау қатысушысы Нұрбек Әлиасқаров.
Шара барысында Елбасы Жолдауында көрсетілген 10 басым бағытқа және халықтың жағдайын жақсарту мақсатында ұсынған 5 бастамасына баса назар аударылып, өңірде атқарылған толымды істер мен жағымды жаңалықтар дәріптелді.
Өнер бәйгесінің қорытындысында А.Тоқмағамбетов атындағы қалалық мәдениет үйі жанынан құрылған «Бірлік» мәдени үгіт бригадасы бас жүлде иемденді. Одан кейінгі орындарды жалағаштық «Арай» тобы, қармақшылық «Өрлеу» тобы, шиелілік «Сыр маржаны» тобы иеленді. Ал, жаңақорғандық «Дала жұлдыздары» тобы ынталандыру сыйлығына ие болды.
Биболат Сағындықұлы
