БЕЛГІЛІ ХОРЕОГРАФТЫ ЕСКЕ АЛУ КЕШІ ӨТТІ
Белгілі хореограф, Ы.Алтынсарин медалінің иегері Болат Қаржаубаевты еске алуға арналған «Томирис» би ансамблінің концерті болып өтті.Оған Болаттың баласы мен бауыры Мұрат Қаржаубаев қатысты. Шара басталар тұста проекторлы экраннан Б.Қаржаубаев туралы бейнесюжет көрсетіліп, дарынды өнер иесі жайлы жан-жақты мағлұмат берілді. Оның білімге құштар болғаны айтылды.
Болат ағамыз училищеде 8 жыл бойы би өнерінің қыр-сырын меңгеріп шыққан. Оны бітірген соң Алматы қаласындағы түрлі ансамбльдерде, одан опера театрында жұмыс істеді. Одан соң кәсіби биші ретінде қалыптасып, өзінің туған жері Сыр өңіріне келіп, еңбек жолын колледжде жұмыс жасап жалғастырды. Бүгінде Болат Майлыбайұлының артынан ерген қаншама шәкірттері бар. Қазір олардың өзі ұстаз болып жүр. Сондықтан, талантты биші өзі өмірден ерте кетсе де, оның өнері ешуақытта өшпейді.
