БЕДЕЛДІ БАНКТІҢ БЕЛЕСІ
«Тұрғын үй құрылыс жинақ банкі» өзінің туған күнін ерекше атап өтті. Елімізде 15 жылға жуық уақыт қызмет етіп келе жатқан банк филиалы бүгінде тұтынушыларын тұрақты қалыптастырып үлгерді. Халықпен тығыз қарым-қатынас орнатып, қолжетімді баспана ұсынып келеді. Ал, банктің Қызылордадағы филиалы туған күнін өзінің тұрақты тұтынушыларымен бірге тойлауды жөн санапты. Салтанатты шара барысында «Нұр Отан» партиясы қалалық филиалы төрағасының бірінші орынбасары Шәріп Әбдірахманов пен өзге де банк өкілдері келіп, ұжым мүшелерін мерекемен құттықтады.
– Бүгінде салымшылардың саны 49 мыңға жуықтады. Мемлекеттік бағдарламалармен бастау алып, "Қолжетімді баспана-2020", "Орда" өңірлік тұрғын үй, "Нұрлы жол", "Нұрлы жер" бағдарламалар аясында көптеген жерлестереміз пәтер кілтіне қол жеткізді. Сондай-ақ, мұндай игі бастамалар Елбасының тұрғын үй ипотекасын қолжетімді ете алатын "7-20-25" жаңа бағдарламасымен өз жалғасын тапты. Осындай мемлекеттік қолдаудың негізінде Қызылорда халықты баспанамен қамту мәселесіне келгенде Астана қаласынан кейінгі екінші орында тұр. Бұл – өңірде тұрғындарға аталмыш бағытта қолдау көрсетуде жағдай жасалғанының дәлелі, – дейді "Қазақстан тұрғын үй құрылыс жинақ банкі" АҚ Қызылорда филиалының директоры Әділжан Сәулебаев.
Сондай-ақ, жиын барысында банктің Қызылордадағы филиалының негізін қалаушы Жүсіп Тасқынбаев құттықтап, үздік қызметкерлер мен әлеуметтік желіде ұйымдастырылған байқаудың жүлдегерлерін марапаттады. – Мен бүгін сайыс жеңімпазы атанғаныма өте қуаныштымын. Өзім осы банктің тұтынушысымын. Осыдан үш жыл бұрын "Арай-2" мөлтекауданынан үй алып, қоныс тойын тойладым. Одан кейін де аталмыш банктің жаңалықтарына құлақ түріп отырамын. Бүгінде бұл қаржы компаниясының тұрақты салымшысына айналдым, – дейді қала тұрғыны Анар Ибрагимова.
Айта кетейік, "Қазақстанның тұрғын үй құрылыс жинақ банкі" АҚ – еліміздегі осы бағыттағы жүйені жүзеге асыратын бірден-бір құрылым. Еуропалық құрылыс жинақ кассалары федерациясына және халықаралық тұрғын үйді қаржыландыру одағына кірген банк қазіргі таңда халыққа бар мүмкіндікті ұсынып келеді.
Бағлан ТІЛЕУБЕРГЕНОВА.
Суретті түсірген: Н.НҰРЖАУБАЙ.
