САЛАУАТТЫЛЫҚ САЙЫСЫ
Қазалыда салауатты өмір салтын насихаттау мен бұқаралық спортты дамыту тұрғысында түрлі спорттық шаралар жиі өткізіліп тұрады. Спортқа деген қызығушылықтың артуы осындай жоғары деңгейде ұйымдастырылған шаралардың жемісі екені анық. Бұл сайыстар қатарына соңғы жылдары дәстүрлі веложарыс қосылды. Әуесқойлар арасында өтетін сайыс көпшіліктің ықыласына бөленуде. Жуырда «Ұлт саулығы» идеясын насихаттау барысында аудан орталығында өткізілген «Tur de Qazaly 2018» веложарысына 15-30 жас аралығындағы 50-ден астам спортшы қатысты.
Айта кетерлігі, жеңімпаздарды марапаттау 3 санатқа бөлінген болатын. «А» санаты бойынша І орынды Ырысбек Әбубәкір, «В» санатымен Бауыржан Орынбасаров, «С» санаты бойынша Ақтілек Әбілғазы жеңімпаз атанды. Велоспортты дамыту мақсатында өткізілген абсолюттік біріншілікте 18 шақырымдық жарыс жолында топ жарған спортшыларды марапаттау салтанатында аудандық ішкі саясат бөлімінің басшысы Ғани Темірбаев пен «Заң заңғары» компаниясының өкілі Рауан Есбергенов жеңімпаздар мен жүлдегерлерге дипломдар, медальдар, ақшалай және бағалы сыйлықтар тапсырды.
Қазалы ауданы.
