ҚҰС ЖОЛЫ
Бала күнімізде зеңгір көкті ерекше әсемдікке бөлеп тұратын беймәлім құбылыс туралы үлкендерден сұрағанымызда оны үнемі "Құс жолы" деп атайтыны есімізде. Шынымен, қанаттыларға бағыт-бағдар беріп тұратындай әлгі құбылыс күндіз де, түнде де еш өзгермеуші еді. Ал, оның пайда болу тарихы туралы аңыз-әпсаналар өте көп. Солардың бірінде құс жолы – ботасын жоғалтып, іздеп жүрген аруананың желінінен аққан сүттен қалған із екендігі айтылады. Көк жүзінде топтасып ұшқан жыл құстарын алғаш көргенде «Көкала құс тәуір ме?» деп сәлем беретін салт болыпты. Ол құс патшасы екен-мыс. Ал, астроном ғалымдар ғылыми тұрғыда оны құрамына күн жүйесі және көптеген жұлдыздар енетін алып аумақты спиральді галактика екенін айтады. Ол шамамен екі жүз миллиард жұлдыздан, сондай-ақ жұлдыз шоғыры мен тобынан, газ бен тозаң тұмандықтарынан және жұлдызаралық кеңістікке таралған жеке атомдар мен түйіршіктерден құралған деседі. Сіз бұл туралы басқа қандай аңыз-әңгімелер білесіз, оқырман! Бөлісе отырайық!
Дайындаған: Б.ЖАРЫЛҚАП.
