Қазалыда жер учаскесі берілмек
Қазалы ауданында тұңғыш рет Біріккен Араб Әмірліктеріне 29 бас түйе, Өзбекстанға 100 бас мүйізді ірі қара малы экспортталды. Ал, биыл 400 бас ірі қара малын экспорттау жоспары бар. Ауданда былтыр «Бақыт» шаруа қожалығы Ресей Федерациясынан 29 бас ірі қара малын әкелген. Биыл шаруашылықтар тарапынан шет мемлекеттен асыл тұқымды 400 бас мал алынады деп отыр. Бұл туралы өңірлік коммуникациялар қызметінде өткен баспасөз мәслихатында аудан әкімі Мұрат Ергешбаев мәлімдеді. – Өткен жылы төрт түліктің барлық түрінде өсім болды. Аудан халқының негізгі тіршілігі – егін және мал шаруашылығы. Былтыр 17790 гектар жерге ауыл шаруашылығы дақылдары егілді. Су жеткіліксіздігіне қарамастан негізгі дақыл – күріштің әр гектарынан 44,3 центнерден өнім жиналды. Ал биылғы жоспар – 17 700 гектар жерге ауыл шаруашылығы дақылдарын егу, – деді аудан әкімі.
Қазалыда тұрғын үйге мұқтаж 842 азамат кезекте тұр. Мәселені шешу үшін былтыр «Нұрлы жер» бағдарламасы бойынша Әйтеке би кентінде 6 көпқабатты тұрғын үйдің құрылысы басталды. Сондай-ақ, кент пен қала аралығынан 2 қабатты 12 тұрғын үй құрылысын салу үшін құжаттар әзірленген.
Ауданның инженерлік-инфрақұрылымын дамыту мәселесі бойынша бірқатар іс-шаралар атқарылған. Былтыр бұл аумақтан 800 адамға жер берілді. Биыл электр желілері, ауыз су мен газ апару жалғасып, ол аяқталған соң, 1500 адам тұрғын үй салу үшін жер учаскесін иеленеді.
– Биыл «Әлсейіт» көпірінің құрылысын аяқтап, көпірдің игілін көреміз деп жоспарлап отырмыз. 2017-2018 жылы бөлінген қаражатқа тиісті жұмыс жасалды. Үстіміздегі жылы көпір құрылысын аяқтаймыз деп жоспарлап отырмыз. Ал, «Қарлан» учаскесіне көпір салу облыс әкімінің қолдауымен САРАТС-2 жобасына енгізілді, – деді М.Ергешбаев.
Жарасхан ҚУАНЫШБАЙҰЛЫ.
