ЖАЛАҒАШ ДИҚАНДАРЫ ЖОҒАРЫ ӨНІМ ЖИНАП ЖАТЫР
Жалағаш ауданы бойынша егілген 22465 гектар күріш жайқалып, бітік өсті. Аудан бойынша бірқатар шаруашылықтар күріштерін орып та, бастырып та болып, жақсы нәтижеге қол жеткізуде.Кешегі күнге дейін Ақсу ауылдық округінен «Мираж» шаруа қожалығы 170 гектар күріштің әр гектарынан – 55, «Ақсу» шаруа қожалығы 110 гектардан – 60, Бұқарбай ауылдық округінен «Байтабын» ЖШС 61,5, Мақпалкөл ауыл округінен «Құрманбай ата» шаруа қожалығы 425 гектар күріштің әр гектарынан – 65, «Ақниет» ШҚ 190 гектар күріштің әр гектарынан – 62, Мәдениет ауылдық округінен «Жігер» қожалығы 349 гектар күріштің әр гектарынан 65 центнерден сапалы өнім алып, биік белестен көрінді. Сонымен бірге, «Жігер» ШҚ төрағасы Самат Сарбасов пайдаланылмай бос жатқан егістік жерлерді игеріп, игілігін көруде. Атап айтқанда, осы ауылдық округіндегі «Дөйт», «Мирас», «Жомарт», «Тәуекел», «Жұлдыз», «Болашақ», «Өркен» шаруа қожалықтарының барлығы 367 гектар жерін инженерлік жүйеге келтіріп, күріш егіп, орып бастыру жұмыстарын аяқтап қалды. Сондай-ақ, «Таң ЛТД» ЖШС, «Манақ баба», «Егінші», Еңбек ауылдық округінен «Атамекен» қожалығы егін жинау науқанын қарқынды жүргізіп, жоғары өнім алуды қамтамасыз етуде.
