Оңтайлы озық жоба
Сыр өңірінде ІТ саласына қызығушылық танытып жүрген жастар қатары артып келеді. Дарынды өрендерге қолдау көрсету бағытында облыс әкімінің биылғы оқу грантарының 70 пайызы осы салаға қажетті мамандықтарға арналған. Облыста инновациялық жобаларға әрдайым қолдау көрсетіліп келеді. Облыс әкімінің қолдауымен «Болашақ университетінде» IT-echelon бағдарламалық жобасы басталды. Осыған орай арнайы оқу бағдарламасының ашылу салтанаты «Болашақ» университетінде өткізілді. Оған облыс әкімінің орынбасары Руслан Рүстемов, облыстық цифрлық технологиялар басқармасының басшысы Индира Ақжігітова қатысты. «IT-echelon» – бұл ВЕБ-қосымшаларды әзірлеудің негізгі аспектілері бойынша онлайн мүмкіндігін беретін оқу бағдарламасы. Оған қатысушылар фундаментальді аспектілер бойынша онлайн интенсивтермен веб-қосымшаларды әзірлеуді үйренеді. Жаңа жобада Қазақстанның және ТМД елдерінің Яндекс, Майл ру, Tinkoff секілді ІТ компаниялардың кәсіби мамандарынан дәріс алатын болады. Осылайша, жарты жыл көлемінде жастарымыз frontend-әзірлеу мен технологиялық кәсіпкерлік бойынша білім алады.
Жоба аясында оларға семинар, воркшоп, кездесулер мен бизнес-ойындары жүргізіледі. Оқу курсы 6 айға есептелген. Оның ішінде 72 сағат онлайн-оқыту, сауалнама жүргізу және қатысушыларды іріктеу, 6 семинар, 8 воркшоп, 4 кездесу және 2 бизнес-модель ойыны бар. Оған мектеп оқушылары, университет және колледж студенттері қызығушылық танытуда. Олардың арасынан 200 қатысушы іріктеліп алынады. Бұл жоба бойынша оқу тегін жүргізіледі. Алғашқы онлайн-сабақ 13 наурызда өткізілді. Бағдарлама бағыты бойынша алдағы уақытта технологиялық кәсіпкерлікке, стартаптарды ұйымдастыруға және бизнес-құралдарға ерекше көңіл бөлінеді.
Айта кететін жайт, жоба сандық технологияларды қолдануды жандандыруға, өңірдің IT-инфрақұрылымын дамытуға және халықтың іскерлік белсенділігін арттыруға арналған. Алдымызда бәсекеге қабілетті 30 елдің қатарына қосылу міндеті тұр.
Айтолқын АЙТЖАНОВА.
