Жұлдызы жарқын «Жұлдызай»
Қызылорда қалалық білім бөлімінің ұйымдастыруымен С.Әлжіков атындағы №144 мектепте халықаралық «Жұлдызай» ХІV шығармашылық фестивалі өтті.Аталмыш фестиваль 10-18 жас аралығындағы мүмкіндіктері шектеулі балалар мен жасөспірімдердің әлеуметтік белсенділігін, шығармашылық мүмкіндіктерін дамыту, салауатты өмір салтын қалыптастыру бағытында қоғам, бизнес-құрылым өкілдерінің назарын аударту мақсатында жыл сайын дәстүрлі түрде ұйымдастырылып келеді.
Фестивальге қалалық білім бөлімінің басшысы Ақзира Қасымова қатысып, балаларға сәттілік тіледі.
– Бұл сайыс – ерік-жігерлері ерекше мықты балалардың өміріндегі жаңа баспалдақ. Жаймашуақ көктем күнінде жас өнерпаздар өз өнерлері мен шығармашылық туындыларын ұсынуда. Олардың ерік-жігері бойымызға қуаныш сыйлап отыр. Себебі, балалардың өнерінен өмірге деген сүйіспеншілік, күш-жігер, рух сезіледі. Біз сіздерге сенеміз, – деді А.Бақтыбайқызы.
Жас өрендер ән айту, би билеу, әнді ым ишаратпен айту, аспапта ойнау, қолданбалы көркем өнер, сурет-бейнелеу өнері бойынша өз өнерлерін ортаға салды.
Өнер сайыс ы өзінің 14 жылдық тарихында талай балаға жол ашты. Мәселен, балалар денсаулығын жақсарту мен оңалтуға оң әсерін тигізуде. Атап айтқанда, былтыр фестивальге қатысқан 50 баланың 10-ы ән-би номинациясында облыстық іріктеу кезеңіне өтіп жеңімпаз атанған.
Ал, биылғы жылы 94 өрен қатысып бақ сынасты. Әрбір өнерпаз балаларға қалалық білім бөлімінің алғыс хаты мен сый-сияпаты табысталды.
Айтолқын БАТЫРБАЙҚЫЗЫ.
