ОБЛЫСТЫҚ «АЛТЫН КҮЗ – 2017» СПАРТАКИДАСЫ МӘРЕСІНЕ ЖЕТТІ
Жалағаш ауданында өткізілген ауыл спортшыларының ХХХІ «Алтын күз – 2017» облыстық спартакиадасы бүгін өз мәресіне жетті.Төрт күнге созылған аламанда спортшыларымыз өздерінің шапшаңдықтары мен қайсарлықтарын дүйім жұртқа паш етті. Ауыл спортшыларының ХХХІ «Алтын күз-2017» облыстық спартакиадасын қорытындылаған спарктакиаданың бас хатшысы Ғ.Сиқымов байрақты бәсекеде өз шеберліктерімен көзге түсіп, аламанда оза шапқан жарыс жеңімпаздарын марапаттады.
Жарыс нәтижесінде командалық есепте 113 ұпай иеленген Шиелі ауданы жарыс жеңімпаздары деп танылып, арнайы кубоктармен және грамоталармен марапатталса, жүлделі ІІ орынды 107 ұпаймен Сырдария ауданы иеленді. Ал ІІІ орынды 99 ұпаймен Жаңақорған ауданының құрама командасы қанжығасына байлады. Салтанат соңында спартакиада жалауын Жалағаш ауданы Жаңақорған ауданына салтанатты түрде табыстады.
