АУДАНДА АУЫЗ СУ МӘСЕЛЕСІ ШЕШІЛГЕН
2015 жылы ІІІ- Интернационал-Жосалы бағытында 19 шақырым су құбырының құрылыс-монтаж жұмыстары жүргізіліп, Жосалы кентінің су жетіспеушілігі жөніндегі мәселе оң шешімін тапқан. Алайда аудандағы халық санының артуына сәйкес өңірге көп көлемді су сақтау қоймасын салу қажеттілігі туындаған. Түйткілді мәселе араға аздаған жыл салып шешімін тапты. 2017 жылы «Нұрлы жол» бағдарламасы бойынша Жосалы кентінен «ІІ-су көтеру насос станциясын және ішкі су жүйесін қайта жаңғырту» жобасымен 5000 м3 құрайтын су қоймамен насос станцияның құрылыс-монтаж жұмыстарын мердігер «РЗА» АҚ-мен атқарып, толығымен аяқталып іске қосылды.Жосалы кенті тұрғындарын 100% ауыз сумен қамтамассыз ету мақсатында «Нұрлы жол» бағдарламасы аясында «Тұрғын үйлерге су құбырын кіргізу құрылысы ІV- кезең» жобасымен мердігер «Сәт Сервис» ЖШС-гімен 1364 үйге су құбырын кіргізу және көшелерге магистралды су құбырларын жүргізу жұмыстары атқарылды. Ендігі кезекте аудан халқы сапалы сумен қамтылып, ауыз судан қиындық көрмейді. Тіпті жаңадан бой көтерген су сақтау қоймасындағы судың көлемі төтенше жағдай болған жағдайда бір аптаға жететіндігін тиісті сала басшысы тілге тиек етті.
