Жалағаштағы жарқын жобалар
Нарық заманында бақуатты өмір сүрудің бір кепілі – кәсіп ашып, өз ісіңді жүргізу. Бұл саланы кешенді дамыту, кәсіпкерге қолдау көрсету мақсатында түрлі мемлекеттік бағдарлама жүзеге асты. Нәтижесінде жеке ісін бастаймын деген жұртшылыққа жаңа мүмкіндік туды. Аймақтың кәсіпкерлік саласын қолдауда мемлекеттік бағдарламалардың жүзеге асу барысымен танысу мақсатында облыстық кәсіпкерлік және туризм басқармасы баспасөз турын ұйымдастырды. Бұл ретте БАҚ өкілдері Жалағаш ауданындағы кәсіпкерліктің жай-күйімен танысты.Ауыл жұртшылығының негізгі тіршілік көзі мал шаруашылығы. Несібесін төрт-түліктен тапқан жұртшылықтың бұл істе тәжірибесі мол. Ал, мал басын көбейткісі келгендерді мемлекет қашанда қолдауға әзір. Осы орайда Аққұм ауылының тұрғыны Қайрат Дәуіржанов мүмкіндікті қалт жібермеді. «Қызылорда» Өңірлік инвестиция орталығы» ЖШС-нің «Еңбек» бағдарламасымен мал басын көбейту үшін 3 млн. теңге көлеміндегі шағын несиеге он бас мүйізді ірі қара алған. Бүгінде оның қарасы он беске жуықтаған.
Дәл осы бағдарлама игілігін Бұқарбай батыр ауылының тұрғыны Бауыржан Ғазизов та көріп отыр. Бұл мақсатта ол 1 млн. 300 мың теңге қаржыға қол жеткізген. Оған әуелгіде 40 бас қой алса, қазір оның саны 75-ті құрайды. Халқымыз «Мал өсірсең қой өсір, өнімі оның көл-көсір» деп бекер айтпаса керек. Екі кәсіпкердің де алдағы мақсаты мал басын асылдандыру. Мұның пайдасын білетін шаруалар ауыл-аймақты ет, сүт өнімдерімен қамтуды көздейді.
Ал, Аққұмнан ашылған тағы бір кәсіп көзі – «Медғат» тәттілер орталығы. Кәсіп иесі Айнұр Даужанова көп балалы ана. Бұған дейін бала күтімімен үйде отырған оның жеке ісін ашу көптен бері ойында жүрген. Солай «Бастау Бизнес» жобасы арқылы кулинарлық саланы оқиды. Тәтті өнімдерді дайындаудың қыр-сырын игеріп, «Бизнестің жол картасы-2020» бағдарламасымен қайтарымсыз қаражатқа ие болады. Осылайша тәтті өнімдер орталығын ашып, ауыл халқының сұранысын қанағаттандыруда. Бүгінде ондағы жұртшылықтың мерекелік дастарханы Айнұрдың өнімдерімен толысуда. Ісінен береке тапқан ол ендігі кезекте кәсіп аясын кеңейтпек ниетте.
Кондитерлік өнімдер қашанда кең қолданыста. Оған көпшіліктің сұранысы жоғары. Кез келген той-томалақтағы дастархан сәні торт пен тәтті бәліш екені анық. Мұны жіті түсіне білген кәсіпкер Әйгерім Гаюпова кентте осы істі жандандыруды қолға алған. Бұған дейін ол наубайхана ісімен айналысқан. Енді оның жанынан «Ауыл шаруашылығын қаржылай қолдау қоры» АҚ арқылы 4 млн теңге қаражатқа «Тәтті» кондитерлік цех ашып, сұранысқа сай жұмыс істеуде. Кәсіп иесінің айтуынша күніне 200-250 тәтті өнімге тапсырыс түседі екен. Одан бөлек он шақты дүкенге нан өнімін жеткізеді. Кәсіпкер тапсырысты игеру үшін қызметкерлердің екі ауысымда жұмыс істейтінін айтады. Қазір екі цех бойынша 6 адамды еңбекпен қамтып отыр.
Ауданда мемлекеттік бағдарлама негізінде жеке балабақша ашу ісі де нәтиже беріп келеді. Биыл мұнда тағы бір нысан бүлдіршіндерге есігін ашты. Алдымен «Бастау-Бизнес» жобасы арқылы кәсіптік бағытта тәлім алған Нұргүл Ғабиденқызы «Қызылорда» Өңірлік инвестиция орталығы» ЖШС-нің «Микробизнес Қызылорда» бағдарламасымен 3млн. теңгеге 50 орындық «Бәйт» балабақшасын ашқан. Қазір 1 мен 6 жас аралығында балаларды тәрбиелейтін орын төсек жабдықтары, оқу құралдарымен толық қамтылған. Ал бүлдіршіндерге 12 маман қызмет етеді.
Іске епті, еңбекке ниетті жанға қашанда табыс көзі табылады. Қазір қолдан келер дүниені кәсіпке айналдыру қиын емес. Осы ретте мемлекет мүмкіндігі шектеулі жандардың кәсіп ашуына да жағдай қарастырған. Мұны тиімді қолдана білген азаматтың бірі – Манарбек Қожахметов. Қос жанарының көру мүмкіндігінен айырылса да жасымай, жеке кәсібін бастаған. Қазақстанның мүгедектер конфедерациясының қолдауымен Нұр-Сұлтан қаласында арнайы қытайлық дәрігерден емдік массаж жасауды үйренген. Ауданда осы бағытты жандандыру үшін «Бизнестің жол картасы – 2020» бағдарламасымен 1 млн. теңге қайтарымсыз қаржыға массаж орталығын ашқан. Бүгінде инсульт, балалардағы дисплазия, бастың қисықтығы, артроз, артрит, остеохондроз сынды ауруға массаж арқылы ем жасайды. Ендігі ол арнайы спорттық құрал-жабдықтар алып, спорт кешенін ашуды жоспарлап отыр.
Сондай-ақ Жалағашта қонақ үй, монша қызметіне сұраныс жоғары екен. Бұл ретте отыз адамға арналған «Жібек» қонақ үй кешені кент тұрғындары мен қонақтарына қызмет көрсетеді. Ал, бір мезетте 100 адамды қабылдайтын қоғамдық монша аптаның жұма, сенбі, жексенбі күні жұмыс істейді. Оған қоса жұма күні белгілі уақыт аралығында мүмкіндігі шектеулі жандардың тегін моншаға түсуіне мүмкіндік жасаған. Кәсіпкерлер бұл үшін «Ауыл шаруашылығын қаржылай қолдау қоры» АҚ мен «Бизнестің жол картасы – 2020» бағдарламасы арқылы несие алған.
Жалағаш ауданында жыл басынан бері 2300 кәсіпкерлік нысан тіркелген. Бүгінде оның 89,1 пайызы тұрақты жұмыс істейді. Яғни, 2084 нысан халық сұранысын қанағаттандыруда. Аудандық кәсіпкерлік, өнеркәсіп және туризм бөлімінің басшысы Жасұлан Еспенбетовтың айтуынша, тұрғындардың басым бөлігі егін, мал шаруашылығы, жолаушы тасымалы және басқа да кәсіп түрімен айналысады. Бұл салада жастардың үлес салмағы 30 пайызды құрайды.
Айдана САЙДУЛЛАҚЫЗЫ
