Өнер ұжымының жоғары бағасы
Талай-талай сахна тарландарының жұлдызын жағып, бағын ашқан Нартай Бекежанов атындағы драма театры бүгінге дейін 500-ге жуық қойылымды көрерменге ұсынды.Биыл жарты ғасырдан астам тарихы бар өнер шаңырағына ҚР Үкіметінің №800 қаулысымен академиялық мәртебесі берілді. Әрине, бұл – Сыр өнерінің дамуына, жоғары деңгейге көтерілуіне саналы ғұмырын сарп еткен өнер иелерінің еңбегінің еселі жемісі.
Бұл – жетекші және тарихы бай театрларға берілетін құрметті атақ. Ол 1919 жылдан бастап енгізілген. Алғашқы академиялық театр атағы Ресейдің байырғы музей және драма театр ұжымдарына берілді. Елімізде 1937 жылы Қазақ драма театрына, 1941 жылы Қазақтың опера және балет театрына осындай дәрежеге ие болды. Елімізде академиялық атақ берілген санаулы ғана өнер ошағы бар. Биылдан бастап солардың қатарына Сыр өңірінің театры да қосылды.
Соңғы жылдары өнер ордасының материалдық базасын жақсартуға ерекше көңіл бөлінуде. Сондай-ақ, бүгінде ұжымды жас мамандармен қамтып, репертуарды жаңа қойылыммен толықтыруға барлық жағдай жасалған.
Қазіргі кезде театр репертуарында көптеген жанрды қамититын қойылымдар сахналанып келеді. Олар көрерменді бірде күлдірсе, бірде терең ойға батырады. Атап айтқанда, Т.Жүргенов туралы «Темір нарком», атақты ақын А.Құнанбаев туралы «Абай» қойылымы көрермен тарапынан жоғары бағасын алды.
Ақмарал ҚАДЫРХАН
