Қосшыңырау: Сергек ауылдың серпілісі
Бұл ауылға бара жатқанда «Барып қайт, балам, ауылға туған, барып қайт, Шалғынға аунап, құмында ойнақ салып қайт. Өр болып келед біз жақтың азаматтары, Намысын соның көкірегіңде жанып қайт» деген ән жолдары ойға оралды. Себебі күмбірі құлағымнан кетпейтін ауыл баласымыз. Қала әкімі Нұрлыбек Нәлібаевтың бұл жолғы бағыты қала іргесіндегі Қосшыңырау ауылдық округі болды. Бұл округтің тыныс-тіршілігі басқа ауылдардан өзгеше. Мұнда ауылға тән мүлгіген тыныштық жоқ. Қарбаласқа толы тіршілік. Көшеде топтасып әңгіме-дүкен құрған жастарды да кездестірмейсің. Оның орнына зулаған көліктер мен ауылдың қайнаған тіршілігі жүріп жатыр. Қосшыңырау қай кезде де берекелі тірлігімен, ілкімді істерімен көзге түседі. Әсіресе, еңсе тіктеп, тіршілік көзін табуда соны серпіліс аңғарылады. Онда кәсіпкерлік өрісін кеңейткен. Шаруа қожалықтың да шырайын келтіріп жүргендер бар. Қазіргі таңда ауылда қоғамдық көлік мәселесі толығымен шешілген. Ауылдағы 3 мыңнан аса адамның көпшілігі мемлекеттік бағдарламалар игілігін көріп келеді. Бүгінде мұнда өндірістік және әлеуметтік нысандар бой көтерген. Сонымен біз Абай ауылына келіп жеттік. Ауыл клубының алдына тоқтап, бір сәт айналаға көз жүгіртіп қарадық. Тұрғындар ағыла клубқа қарай беттеп келеді. Біз де көппен бірге ішке қарай ұмтылып, жайғастық. Әдеттегідей алдымен ауыл әкімі Дулат Таубайдың есебі тыңдалды. Бүгінде ауылдық округте мәселелер шешімін тауып келеді. Алайда тұрғындардың көптен жолдап жүрген сауалы көшелерге асфальт төсеу мәселесі екен. Мұны ауыл әкімі биылдың жоспарында бар екенің айтты. Қала әкімі Нұрлыбек Нәлібаев өткен жылғы шаһарда атқарылған жұмыстармен таныстырды. Әкімдердің бұл жолғы есебі өзгеше болды. Олай дейтініміз лед экран арқылы халыққа түсінікті түрде барлығын суреттеп дайындаған. Шаһар басшының есебі тыңдалғаннан соң тұрғындар сауал жолдауға кірісті. Соның бірі – зейнеткер Қыдырбай Байкенов.
Досан ауылында күн өткен сайын халық саны артып келеді. Мұнда қоныс аударып келіп жатқан тұрғындар бар. Алайда мұндағы электр бағаналары дұрыс орнатылмаған. Халық өз бетінше жарық жүргізген. Осы мәселені реттеп беруді сұрады зейнеткер.
Қала әкімі Нұрлыбек Машбекұлы болса, бұл мәселе көп ұзамай шешімін табатынын жеткізді. Бүгінде Досан ауылына электр бағаналарын орнату мақсатында жоба сметалық құжаттар жасалғанын, алдағы уақытта жаңадан бағаналар орнатылатынын жеткізді.
Қосшыңырау округінде тұрмысы төмен отбасыларға көмек көрсету дәстүрге айналған. Мұнда өткен жылы 171 отбасы әлеуметтік көмек алған. Сондай-ақ, қайырымдылық шараларыда жиі ұйымдастырылып тұрады.
Ақсақалсыз ауыл болмайды. Ал кезекті сауалын жолдаған ауылдың ақсақалы – Февраль Жанахаев. Ол ауылдың ішкі жолдарын жөндеуді және кешкі мезгілде жарық күшінің әлсіз екенін айтты.
Қала әкімі үстіміздегі жылы ауылдың ішкі жолдарының жөнделетінің айтты. Ауыл ішіндегі маңызды деген көшелерді асфальттау қажет. Қалғаны біртіндеп жөнделеді. Содан кейін біз қажетті қаражатты есептейтін боламыз. Ал, жарықтың әлсіздігіне келетін болсақ. Бүгінде бұл ауылда халық саны артып келеді. Бұрынғы подстанция күші мұндағы үйлерге жетпейді. Сондықтан алдағы уақытта жаңасын орнататын боламыз, – деді Н.Нәлібаев.
Қосшыңырау ауылдық округі халқының биылғы қуанышы мұндағы Досан ауылында 51 отбасы көгілдір отын пайдаланып отыр. Ал биылғы жылы Абай ауылын көгілдір отынға қосу үшін «КазЭнергоПроектСтрой» ЖШС-мен газбен қамту жұмыстары жалғасын табатын болады.
