Қызылорда – игі бастамалар мен тың жаңалықтардың қаласы
Өткен жылға өкпе жоқ, жыл жеміссіз емес. Қаланың өмірінде қаншама қарбалас тірлік атқарылып, оның игілігі ел пайдасына шешіліп келеді. Біз оны санамалап емес, саралап айтсақ та жеткілікті шығар. Бұған дейін де әкім Нұрлыбек Нәлібаев қалаға қарасты кент, ауылдық округтерде, екі қоғамдық қабылдау және қаланың екі аймағында 15 кездесу өткізді. Сол кездесулерде тұрғындарды толғандырған мәселелер талқыға салынып, оларды шешудің мүмкіндігі мен елге тиімді жолы жан-жақты айтылған еді. Әрине, ел бар жерде әлеуметтік мәселе толастамайды, оны уақыт ағымымен қарастырып, түйінін табудың тетігі іздестіріледі. Шаһар басшысының халық алдындағы есебінде де бұл мәселелер назардан тыс қалмады.
