Ақмешіт апталығы

          Осы кезге дейін облыстағы адамдар көп шоғырланатын 3 349 627 шаршы метр аумақ залалсыздандырылған. Ендігі кезекте көпқабатты үйлердің подъездеріне залалсыздандыру жұмыстары жүргізіледі. Сондай-ақ, брифинг барысында қауіпті инфекция жұқтырғандарды анықтау үшін тағы да сынамалар әкелінгені айтылды. Қосымша тағы 2 лабораториялық зертхана іске қосылады.

          Карантиндік режим аясында 3 санитарлық, 32 тосқауыл бекеті әр аудан аумағына орналастырылған. Ондағы материалдық-техникалық база күшейтілген, мамандардың әлеуметтік жағдайы ескеріліп, қосымша көмек те қарастырылады. Ал, әлеуметтік маңызы бар негізгі азық-түлік қоры облыс әкімінің тікелей бақылауында екенін жеткізген Н.Сейітқалиұлы тұрақтандыру қорында 10185 тонна қажетті өнім барын атап өтті. Бұл өз кезегінде қаладағы әлеуметтік дүкендер арқылы сатылымға шығатын болады.

          Сонымен қатар облысқа 10 сәуірден бастап 1-А категориялы елдерден келген азаматтар тіркеуден толық шығарылған. Ал, 1-б категориялы елден келген 109 адамның 7-уі стационарлық, 102-сі үй жағдайындағы бақылауда. Бүгінге дейін «Ұлттық сараптама орталығы» науқастардан 1634 сынама алып, оның 104-і оң, 1445-сі теріс нәтиже берген. Қазір қалған 85 сынаманың нәтижесі күтілуде.

          Осы орайда, күшейтілген карантиндік режимге қарамастан тәртіп бұзушылардың да қатары азаймай отырғаны сөз болды.  Осы кезге дейін талапқа бағынбаған кафе, мейрамхана иесіне қатысты – 40, жеке үй иесі – 22, тосқауыл бұзған – 28, үйден тыс жерге шыққан – 19, тағы сол сияқты бірнеше тәртіп бұзушылық дерегі анықталған.  «Тәртіпке бағынған құл болмайды» деп батыр Б.Момышұлының сөзін тілге тиек еткен маман тұрғындардан болып жатқан жағдайға бей-жай қарамай, талап пен тәртіпке бағынуды сұрады.