Сыр еліне серпін берген жобалар
Елорададан жеткен жаңалық сырбойылықтарды бір серпілтіп тастады. Анығын айтқанда ҚР Премьер-Министрі Асқар Маминнің Қызылорда облысының даму мәселелері жөніндегі кеңесі Сыр елі үшін игі жобалардың жүзеге асатынынан хабардар етті.
Қызылорда облысын дамыту мәселелері жөніндегі жұмыс тобы 100 млрд теңгеге 79 жобаға қолдау білдірді. Биыл өңірде 15,6 млрд теңгеге 42 жобаны қаржыландыру жоспарланған. Жобалар тізімі Қызылорда су торабын қайта жөндеуді бастауды, Қызылорда, Арал қалаларындағы және Тереңөзек кентіндегі сумен және электрмен жабдықтау жүйелерін дамытуды, «БЖК –2025» аясында жас кәсіпкерлерге мемлекеттік грант беруді және шағын несиелендіруді арттыруды, Қызылорда қаласындағы жаңа магистралды көшенің құрылысын жалғастыруды қамтиды.
Білім және ғылым министрлігі халықтың әлеуметтік осал топтарына жататын отбасынан шыққан оқушыларды компьютерлік техникамен қамтамасыз ету аясында Үкімет резерві есебінен облыстың 34,7 мың оқушысы үшін компьютерлік техника сатып алынбақ.
2021 жылы 32 жобаны іске асыру жоспарлануда. Оның ішінде Ақбасты, Тоқабай, Абай, Төретам, Жанқожа батыр, Майдакөл елді мекендерін және Байқоңыр қаласын сумен жабдықтау жүйелерін дамыту, Көкарал бөгетін, Күміскеткен және қараөзек су қоймаларын жаңғырту, сондай-ақ ирригациялық жүйелерді жетілдіру, Жалағаш кентінде газ құбырын және орамішілік газ желілерін салу, тұрғын үй және тиісті инженерлік-коммуникациялық инфрақұрылым салу, соның ішінде Байқоңыр қаласында бес 50 пәтерлі тұрғын үй салу жобасы бар.
