Кәсіптің көзін тапқан бақыттың өзін табады
Кәсіпкерлік ел әлеуетін арттырып, экономикасын еселейтін сала. Қолыңда барыңды үйлестіріп, ұқсата білсең содан саған келер табыс мол. Бұрын үлкендеріміз «үйренгенің өзіңе жақсы, істегенің бізге жақсы» деуші еді. Қазір осы сөзді «кәсіп ашсаң пайдасы өзіңе, өнімі еліңе» деп айтса келіп тұрғандай. Білесіз бе, бүгінде ең көп кәсіп түрін мейрамхана мен шағын цехтар құрайды. Алайда өңірімізде өнімді өзі өндіретін өндіріс орны жоқ. Сыр жерінде жеміс-жидектің кез келген түрі өсіп шығады. Бірақ, содан шығатын өнімді жасап дайындайтын бірде-бір орталық жұмыс істемейді. Дегенмен көрпесіне қарай көсіліп, қолына келгенін жасап жатқан жандар да жоқ емес. Қалада «Қарапайым заттардың экономикасы» бағдарламасы бойынша 31 жоба қолдау тауып отыр. Бұл туралы қала әкімдігінің баспасөз орталығында өткен брифингте қала әкімінің орынбасары Бектас Нұридинов мәлімдеді.
Елімізде өңдеуші өнеркәсіп саласын дамыту мақсатында Үкіметпен «Қарапайым заттар экономикасы» бағдарламасы іске асырылуда. «Қарапайым заттар экономикасын» дамыту – бұл ішкі нарықты отандық тауарлармен толықтыру, ең бастысы халық тұтынатын тауарларды кеңінен қолданысқа енгізу. Мемлекет басшысының тапсырмасына сәйкес бағдарлама қаржысы 1 трлн. теңгеге дейін артып отыр. Оның ішінде 200 млрд. теңге ауылшаруашылық өнімдерін өңдеуге, 500 млрд. теңге ауыл шаруашылық өнімдерін өндіруге және 300 млрд. теңге өңдеумен қызмет көрсету салаларына бағытталған. Бағдарламаның несиенің пайыздық мөлшерлемесін субсидиялау бағыты бойынша несие көлеміне шектеу жоқ. Кепілдендіру бағыты бойынша 3 млрд. теңгеге дейін яғни несиенің 50 пайызына кепілдеме берілсе, 3 млрд. теңгеден 5 млрд. теңгеге дейін 30 процентке кепілдеме беріледі. Аталмыш бағдарламада азық-түлік тауарлары, киім және аксессуарлар, үйге және кеңсеге арналған бұйымдар, құрылыс материалдары бойынша барлығы 46 тауар тобы ішінен 133 экономикалық қызмет түріне басымдық берілген.
– Қызылорда қаласында «Қарапайым заттар экономикасын дамыту» бойынша жалпы құны 2 млрд. 529 млн. теңге құрайтын 31 жоба және ағымдағы жылы 391 млн. теңгені құрайтын 10 жоба қолдау алды. Екінші деңгейлі банктермен қаржы ұйымдарында жоба құны 1 млрд. 360 млн. теңгені құрайтын 5 жобаның құжаттары қаралуда. Сонымен қатар, 290 млн. теңге құрайтын 4 жобаның құжаттары жинақталуда. Жоғарыда көрсетілген бағдарлама аясында жүзеге асырылатын жобаларға қалада орналасқан «Өндіріс» идустриялық аймағына орналастыруға мүмкіндік бар. Индустриялық аймақ бюджет қаржысы есебінен қажетті коммуникациялық инфрақұрылыммен қамтамасыз етілді. Кәсіп ашамын деген кез келген тұлғаға жол ашық. Өткен жыл қорытындысымен қала кәсіпкерлерінің сұранысына сәйкес, жерді жалға алу немесе сату жөнінде өткізілген аукциондар нәтижесінде 34 кәсіпкерлік субьектіге 49 мың 600 шаршы метр жер учаскесі табысталды. Қазіргі таңда, қала аумағында кәсіпкерлерге ұсынылатын жер телімдері қоры жасақталуда. Алдағы уақытта заң талаптарына сәйкес берілетін болады, – дейді қала әкімінің орынбасары Бектас Нұридинов.
Брифингте ҚР «Қаржы нарығын реттеу және дамыту агенттігінің» РММ бойынша Қызылорда қаласындағы өңірлік өнімдер басқармасының басшысы Азамат Мұханов тақырып төңірегінде баяндама жасап, халық игілігі үшін жасалатын кәсіпкерлік жұмыстарға қашанда зор қолдау болатынын атап өтті.
Иә, экономикамыздың қозғаушы күші саналатын кәсіпкерлік саласын қарқынды дамыту бойынша кешенді шаралар қабылдап, жаңадан жұмыс орындарын құру бүгінгі заман талабы. Қолға алынған жобаларды нәтижелі және тиімді жүзеге асыру бойынша жұмыстар ұдайы бақылауда болып, қолдау көрсетілетін баса айтылды.
Қарапайым заттарды қажетсіз қалдырмай қарекет ету халық қазынасын қампайтады. Мәселен, балапан сатып алып үйіңде асыра, қалған ас ауқатты жей береді. Артық ақша сұрамайды. Өсіріп өнімін сатасың немесе ас қатыққа пайдаланасың. Міне, сенің ұтарың. Брифингте айтылған басты ой осыған саяды.
Тұрар БЕКМЫРЗАЕВ
