Кәсіпкерге көмек
Кәсіпкерге қолдау көрсету ел экономикасын дамытудың басты қадамы екені даусыз. Түрлі бағдарлама мен оңтайлы жобалардың артқан міндеті де – кәсіп иесінің әлеуетін көтеру, қаржылай демеу. Әсіресе, әлемдік панденмия салдарынан тұралаған бизнес нысандарын жандандыру ісі кезек күттірмес амал.Осы бағытта мемлекеттік жүйелі жоспар мен қаржы институттары бірлескен бастамасы үлкен көмек болары белгілі. Соның бірі «Бизнестің жол картасы – 2025» бағдарламасы. Қазіргі таңда бағдарлама негізінде бизнеспен айналысуға жеңілдетілген несие ұсынылуда.
– Қазір облыста «Бизнестің жол картасы - 2025» бизнесті қолдау мен дамытудың мемлекеттік бағдарламасы аясында облыс аумағындағы кәсіпкерлерді шағын несиелендіру жұмыстары басталуда. Қаржыландыратын «Қызылорда» өңірлік инвестициялық орталығы. Бағдарлама бойынша берілетін несиенің сомасы 5 млн теңгеден 10 млн теңгеге дейін. Мерзімі 5 жылға, – дейді Кәсіпкерлер палатасының бөлім бастығы Гаухар Елеусінова.
Мамандардың сөзінше, шағын несиенің пайыздық мөлшерлемесі 17,5 процентті құрайды. Оның ішінде инвестициялық мақсатқа берілетін несие бойынша бастапқы 3 жылға, ал айналым қаражатына берілетін шағын несиенің бастапқы 2 жылға пайыздық мөлшерлемесін мемлекет тарапынан 11,5 процентке субсидиялау қарастырылған. Яғни инвестициялық мақсатқа берілген несиелердің бастапқы үш жылында, ал айналым қаражатына берілетін несиенің бастапқы екі жылында кәсіпкер пайыздық мөлшерлемені 6 %-бен төлесе, мемлекет тарапынан 11,5 проценті субсидияланады.
– Бағдарлама аясында несие алуға ниет білдірген азаматтар кәсіпкерлер палатасының аудандық филиалы мен аудандардағы кәсіпкерлік, өнеркәсіп және туризм бөлімінен қажетті сауалдарына жауап бере алады. Сондай-ақ Қызылорда қаласындағы Кәсіпкерлер палатасы мен «Қызылорда» Өңірлік инвестициялық орталығына да жүгінуге болады, – дейді Гаухар Елеусінова.
Е.БАЛТАБЕКҰЛЫ
