СЫРДАРИЯДА ЕЛТАЙ ТЫНЫШТЫҚБАЕВТЫҢ АТЫНА КӨШЕ БЕРІЛДІ
Сырдария ауданының орталығындағы жаңа қоныстану аймағынан "Еңбек Қызыл Ту", "Құрмет белгісі" ордендерінің иегері, су шаруашылығы саласында еңбек еткен білікті маман Елтай Байназарұлы Тыныштықбаевтың атына көше берілді. Көшенің ашылу рәсіміне соғыс және еңбек ардагерлері, зиялы қауым өкілдері мен Е.Тыныштықбаевтың ұрпақтары қатысты. Көшенің ашылуында сөз алған облыстық мәслихат хатшысы Н.Байқадамов су шаруашылығы саласында қажырлы еңбек еткен Е.Тыныштықбаевтың өмір жолы мен облыс көлемінде атқарған қызметтеріне тоқталды. Қоршаған ортаның қамқоршысы ретінде тындырымды тірліктер жүргізгенін атап өтті. Ал, облыстық ардагерлер кеңесінің төрағасы С.Шаухаманов ардақты азаматпен бірге қызмет атқарғанын айтып, дара тұлғаның болмыс-бітімі көпшілікке үлгі екенін жеткізді. Өз кезегінде аудандық ардагерлер кеңесінің төрағасы Х.Әбенұлы аудан халқының ерекше ықыласына бөленген эколог жайында кеңінен мағлұматтар берді. Көше ашылу рәсімінен кейін Тереңөзек кентіндегі "Темірқазық" мейрамханасында Елтай Тыныштықбаевтың рухына арналып ас беріліп, құран бағышталды.
