МӘУЛІТ МЕРЕКЕСІ АТАЛЫП ӨТТІ
Бүгін Жалағаш аудандық «Иманқұл» мешітінің ұйымдастыруымен адамзаттың ардақтысы, көркем мінездің өшпес үлгісі Мұхаммед (с.ғ.с.) Пайғамбарымыздың туылған күніне орай Мәуліт мерекесі аталып өтті.
Діни іс-шарада алғашқы болып сөз алған Жалағаш ауданының әкімі Қ.Сәрсенбаев жиналған қауымды Мәуліт мерекесімен құттықтады. Шарада аудандық ардагерлер кеңесінің төрағасы С.Алиев, кент ардагерлер кеңесінің төрағасы Б.Көштаев, «Иманқұл»мешітінің бас имамы А.Мадиев сөз алып, Мәуліт мерекесінің маңыздылығына тоқталды.
Мәуліт мерекесінде Алла тағаланың елшісі Мұхаммед (с.ғ.с.) Пайғамбарымыздың қарапайымдығы мен ұлылығын насихаттайтын ғибраттық әңгімелер, Құран сүрелерін, Пайғамбарымыздың (с.ғ.с.) дүниеге келуіне байланысты түскен аяттар оқылды. Әсіресе, имандылық жолында сан мыңдаған қиындықтардан жол тауып шығатын, жалпыадамзаттық құндылықтарды дәріптейтін бейнероликтер, уағыздар тыңдаушының рухани тынығып, ой топшылауына ықпал етті.
