ЖАСТАР – БОЛАШАҚТЫҢ ТІРЕГІ
Елбасының «Болашаққа бағдар: рухани жаңғыру» бағдарламасы арқылы оқушыларды әлеуметтік маңызы бар іс-әрекеттерге машықтандыру мақсатында №4 С.Сейфуллин атындағы орта мектепте семинар өтті. Жиынға қалалық білім бөлімінің басшысы Ақарыс Нұрсейітов қатысты.Шара барысында ұлттық нақыштағы қолөнер, робототехника бұйымдарының көрмесі және үйірмелік жұмыстар қолға алынды. «Білімнің салтанат құруы» тақырыбында Қорқыт ата атындағы ҚМУ-нің бизнес инкубатор жетекшісі Ж.Оразмаханов, «Рухани жаңғыру» орталығының бөлім басшысы Ә.Жақыпова және жастар ресурстық орталығының КММ жауапты маманы Ә. Ибрахим әңгімелеп берді.
Жастар – болашақтың тірегі, Қазақстанның жетістігі мен өркендеуінің кепілі. Бұл – өскелең ұрпақтың Отанға деген сүйіспеншілігі, жауапкершілігі, ұлттық сана-сезімі, білімділігі мен кәсібилігі, мемлекетіміздің дамуына өз үлесін қосуға ынтасын қалыптастыруда жасалып жатқан шаралардың маңызы зор.
– Рухани жаңғырудың басты мақсаты – Қазақстан азаматы қандай болуы керек деген сұраққа жауап беру. Техникалық сауаттылығы бар, шет тілін меңгерген, мәдениеті жоғары ұрпақ келешегімізді кемел ете түседі. Баланы 1 сыныптан бастап қабілетін дамытып, тұлға ретінде қалыптастыруға атсалысуымыз керек, – деді «Рухани жаңғыру» орталығының бөлім басшысы Әлима Жақыпқызы.
Ақерке СЕЙІТОВА,
ҚМУ-дің IV курс студенті.
