САҢЛАҚТАР ШЫҢДАЛҒАН СПОРТ КЕШЕНІ
Қала орталығындағы ерекше сәулеттік үлгімен әспеттелген «Евразия» мәдени-спорт кешенінің салынғанына биыл 34 жылдан асып барады. Қырық жылға жақын уақытты әлдеқашан тарих қойнауына жіберсе де, ғимарат әлі де сынын сақтап, сыр бере қоймаған. 1984 жылы ел игілігіне берілген нысан қазірге дейін өз келушілеріне есігін айқара ашып, сан түрлі сапалы қызмет түрін ұсынып келеді. Ал, тұрғындар мұнда қанша мәрте ат басын бұрып, салауатты өмір салтын ұстануға мүмкіндік алып жүрсе де, бұл нысан алғаш рет «Дельфин» атауымен ашылғанынан көбісі бейхабар. Десе де, сол кездегі аға буын өкілдерінің арасында бұл кешенді әлі күнге дейін сол атауымен атайтындар бар. Мәдени-спорт орталығы 2001 жылы ғана қазіргі атауын иемденген. Сол жылы оған күрделі жөндеу, қайта салу және кеңейту жұмыстары жүргізіліп, үлкен ойын залы, боулинг, жаттығу залдары ашылған. Соңғы 10 шақты жылдан бері облыстық спорт және дене шынықтыру басқармасына қарасты ұлттық спорт түрлері және бұқаралық сауықтыру-дене шынықтыру клубы болып қайта құрылды. Содан бері бұл кешен ұлттық спорт түрлері және көпшілік-сауықтыру, дене шынықтыруды насихаттау, оқу-жаттығу процестерін жүргізу, спорттық жарыстар өткізу, түрлі деңгейдегі іс-шараларға спортшы дайындау, жыл бойы жаттығу сабақтарын ұйымдастыру сынды игілікті істердің жандануына қызмет етіп келеді.– Мұнда қала тұрғындары демалыс уақытын өткізіп ғана қоймайды, сондай-ақ, жастардың қолайлы түрде жаттығуына бар мүмкіндік жасалған. Нысан қаладағы ең көлемді кешендер қатарын құрайды. Мәселен, үлкен залда күрес, каратэ-до, таеквандо, және джиу-джитсуге арналған бөлмелер бар. Ал, екінші қабатта атлеттер залы орналасқан. Жаңадан келгендер үшін залда жаттығу құралдарын қалай пайдалану керектігін түсіндіретін білікті мамандар жұмыс істейді. Барлығын қосқанда мұнда 44 қызметкер еңбекпен қамтылған. Сонымен қатар, ғимараттың екінші бөлігінде 620 орындыққа шақталған футзал бар. Онда облыстық, республикалық, тіпті халықаралық деңгейдегі спорттық сайыстар өтіп келеді, – дейді кешен директорының орынбасары Талғат Әбдіғаппарұлы.
Ал, алдағы уақытта жалпы ауданы 600 шаршы метрді, ұзындығы 25 метрді құрайтын бассейн күрделі жөндеуден өтпек. Барлығы 6 жолмен жабдықталған үлкен хауызда бір уақытта 40 адам емін-еркін суға түсе алады. Бұған дейін келушілер бассейнді жеке жаттығуларға көп пайдаланған. Себебі, мұнда кешен нұсқаушыларының көмегімен жүзудің түрлі тәілдерін үйренуге мүмкіндік алады. Сондай-ақ, кешен басшылығы санитарлық тазалық пен жеке бас гигиенаның сақталуына да аса мән береді. Өйткені, орталық қызметкерлері өз келушілерінің денсаулығы басты орында екенін айтады. Мәселен, ғимарат бассейнін пайдаланушы тұрғын ең алдымен тері-венерологиялық диспансерден белгілі бір жұқпалы аурумен ауырмайтындығын растайтын анықтама әкелген жағдайда ғана суға түсуіне рұқсат беріледі. Ал, әр сағат сайын оған залалсыздандыру үшін сүзгілеу жүргізіледі. Сондай-ақ, студент, мүмкіндігі шектеулі жандар мен зейнеткерлерге арнайы жеңілдіктер де қарастырылған.
Қашанда байрақты бәсекелер мен білек күші сыналатын түрлі додалардың нағыз қайнаған ортасына айналған нысанда биылдың өзінде бірнеше сайыс ұйымдастырылды. Жан-жақтан бас қосқан спорт шеберлері мұнда ауыр атлетикадан және самбодан ҚР чемпионаты, жекпе-жек сайысынан ерлер мен әйелдер арасындағы кубок пен өзге де сайыстарда өзара бақ сынасты.
«Евразия» кешені осылайша аймақтың спорт саңлақтары шеберлігін шыңдаумен қатар, тайталасқа толы тартыстың куәсі болып келеді. Ал, қайсыбір додада болсын сыр бермейтін Сырдың сырбаз спортшылары тілеуін тілеген ағайынды қашанда толайым қуанышқа кенелтіп жүр.
Бағлан ТІЛЕУБЕРГЕНОВА.
Суретті түсірген: Н.НҰРЖАУБАЙ.
