Ақмешіт апталығы

Қардың  қалың түскені соншалық, ағаштың бұтағы майысып, ерекше сипат беріп тұр. Қасына барсаң құдды иіліп, сәлем салып тұрғандай күй кешесің. Иә, табиғаттың шеберлігінде шек жоқ. Адам баласы бар күшін салса да, дәл мұндай көріністі қолдан істей алмасы анық.  

Десе де, қалада көктайғақты болдырмау, адам өміріне қауіп төндірмеу мақсатында қар күреуге тиісті сала мамандары таңмен таласып, жұмыла іске кірісті. Оның ішінде «Қызылорда тазалығы» мекемесі күшейтілген режимде жұмыс істеуде. Бүгінде көшені қардан тазалап, құм себу жұмысына мамандандырылған техниканың 42-і және 130-ға жуық қызметкер күш жұмылдырды. 

Өздеріңізге мәлім, Президент Қасым-Жомарт Тоқаев 2020 жылды «Еріктілер жылы» деп жариялады. Осы тұста қалалық ішкі саясат бөлімінің бастамасымен әлеуметтік желіде «Біз біргеміз» атты қар күреу челленджі ұйымдастырылды.  Осылайша жергілікті тұрғын, ерікті жастар өз ауласын, қоғамдық орындарды, көмекке мұқтаж жандар мен қариялардың ауласын қардан тазарту жұмысына белсене кірісіп кетті.

Сыр өңірінің 50-ден аса ерікті жасы Ұлы Отан соғысы ардагерлерінің үйін тазалауға көмек көрсетті. Сондай-ақ, қаламыздағы «Абай» аллеясына тазалық жұмыстарын үнемі жүргізіп отыруды қолға алуда. Мұндай игі іске барлық ауданның ерікті жастары үлес қосуда. Олар да ардегерлер мен көмекке мұқтаж жандарға қол ұшын созып, ауласын тазартып беруде.

«Жақсылықты бөліссең көбейеді» демекші, аталған челлендж республика көлемінде жүзеге асуда. Біздің өңірде де «Жолды қауіпсіз ету өз қолымызда! Сіздерді де осы жұмысқа белсенді түрде үлес қосуға шақырамыз» деген ұранмен біршама қызылордалық көшеге шығып қар күреді. Олардың қатарында жеке кәсіпкер мен қарапайым халық та бар.

«Жұмыла көтерген жүк жеңіл» деп бекер айтылмаса керек. Жарты күннің өзінде қаланың біраз көшесі қардан тазарып қалды. Атап айтсақ, көлік жүретін басты көшелер, жаяу жүргіншілер жолы, дүкендер мен адам көп шоғырланатын орындар тазартылды. Осындайда «Бірлік бар жерде тірлік бар» деген тәмсіл еріксіз еске түседі.