Ақмешіт апталығы

Жыл басында аталған бағдарлама аясында қаладағы 280 көшеге күрделі, орташа жөндеу жұмыстары жүргізіліп, 30 балалар ойын алаңы, 3 спорттық алаң салынатыны, жарық, жылу жүйелері қайта жаңғыртылып, мәдениет, спорт, білім ошақтары жөнделетіні айтылған. Күн жылысымен бұл тірлік қолға алынып, қаладағы құрылыс қыза бастаған. Әрқайсысының белгіленген уақыты бар. Жүктелген міндетті сол межеге дейін аяқтауы тиіс. Әсіресе, жұмыстың сапасына басымдық беру керек. Бұл шаһар басшысының басты талабы.

Апта басында осы бағытта атқарылған жұмыстарды ҚР Парламенті Сенатының депутаты Мұрат Бақтиярұлы мен қала әкімі Нұрлыбек Нәлібаев бақылап қайтты.

Жұмыс барысы алдымен қалаға қарасты Қызылөзек ауылдық округінен басталды. Мұнда бағдарлама бойынша 3 жоба бар. Соның бірі – Қараөзек бекетінің 2,5 шақырым болатын орталық көшесіне орташа жөндеу жүргізу. Отыз жылдан аса уақыт жөндеу көрмеген көше қазіргі таңда асфальтталған, көшені жарықтандыру ісі де шешілген. Одан бөлек 1,5 шақырымды құрайтын Ж.Жабаев көшесіне қиыршық тас төселуде. Ауыл тұрғынының базынасына айналған жол мәселесі биыл осылайша оң шешім тауып отыр. Шаһар басшысы Н.Машбекұлы да бұған басымдық берілгенін атап өтті.

– Қалаға қарасты 7 ауылдық округ пен 2 кент бар. Соның барлығының кіре беріс жолдары жөнделген. Негізгі басымдықты қоғамдық көлік қатынайтын жолдар мен мектеп, балабақшаға апаратын көшелерге беріп отырмыз, – деді қала әкімі.

Былтыр бұл ауылда жекеменшік-әріп­­тестік негізде салынған дәрігерлік амбула­тория пайдалануға берілген. Сапар барысында медицина нысаны да назардан тыс қалмады. Сенатор ауыл тұрғындарымен тілдесіп, көкейтесті мәселеге құлақ түрді. Амбулаторияның ашылғанына қуанған жұрт, енді мамандардың қатары толықса дейді. Дәрігер тапшылығы қызылөзектіктер үшін бүгінгі күннің өзекті мәселесі болып тұр. Дегенмен сәтін салса бұл да оң шешімін табады. Қала әкімі мәселені тез арада шешуді сала басшыларына нықтап тапсырды.

Бұдан кейінгі бағыт Талсуат ауылында жалғасты. Мұнда да инфрақұрылымды дамыту қажет. Талсуаттықтарды да толғандырған басты мәселе – жолдың жайы. Бұл ретте биыл ауылда «Жұмыспен қамтудың Жол картасы – 2020» бағдарламасымен 4, «Өңірлерді дамыту» жобасымен 1 көше жөнделіп, демеушілер көмегімен 3 көшеге асфальт төселеді. Солай ондағы 8 көше жаңаратын болады.

Бағдарлама аясында көптен жөндеу көр­меген бірқатар нысан қайта жаңғыратын болды. Олардың қатарында білім ошақтары, мәдениет, спорт ғимараттары бар. Сенатор М.Бақтиярұлы сондай негізгі нысанның бірі – «Локомотив» стадионының және И.Әбдікәрімов атындағы аграрлы-техника­лық жоғарғы колледж ғимаратының құрылыс жұмысымен де танысты.

«Локомотив» стадионы соңғы рет осы­дан 13 жыл бұрын жөндеу көрген екен. Содан бері ескіріп, тозығы жеткен. Кей жерлері заманауи бағытта жаңғыртуды талап етеді. Сондықтан биыл стадионды күрделі жөндеуден өткізіп, спортшылардың соңғы үлгідегі ғимаратта жаттығуына жағдай жасалмақ. Мұндағы құрылысқа тараздық «АгроспецСтрой» мекемесі жауапты екен. Бұған дейін де қаладағы  спорт нысандарын салған мердігер мекеме бұл істе де сапа жағынан «арық сөйлеп, семіз шығады» деген сенім бар.

Ал, аталған оқу орнының бағ­дарлама бойынша шатыры, терезесі мен жылу құбырлары ауыстырылады. Сонымен қатар сыртқы беті әрленіп, ауласына брусчатка төселеді.

Қалаға қарасты кенттің соңғы жылдары ажары айшықтала бастаған. Ұзақ жыл жөндеу көрмеген көшелер ретке келіп, тұрғындардың жаңа келген әкімге деген ризашылығы артқан. Жаңа нысандар ашылып, ел игілігіне жарады. Бүгінде кент тұрғындары қажеттіліктерін қала орталығына бармай-ақ осы жерден таба алады. 

Бүгінде Тасбөгеттегі көшелердің 70 про­центі асфальтталыпты. «Жұмыспен қам­тудың Жол картасы – 2020» бағдарла­масымен қазіргі күні 3,9 шақырым болатын Т.Батыршаев, Сырдария, Ж.Бәкішов кө­шелеріне тас төселіп, қалған жұмыстары істелуде. Сондай-ақ осы бағдарлама бойын­ша кент орталығында  салынып жатқан стритбол спорт алаңы да аяқталуға жақын. Алаң соңғы үлгідегі спорттық құралдармен қамтылған.  Тұрғындардың, әсіресе кент жастарының кез келген уақытта спортпен шұғылдануына бұл алаң таптырмас орын болғалы тұр.

Қаланың инфрақұрылымының дамуына сеп болған аталмыш бағдарламаның әлеуметтік жағынан да пайдасы зор. Қазір­гідей вирус бүйірден қысып, карантинде жұмысынан айырылып, екі қолға бір күрек іздеп сабылғандарды жұмыспен қамту­дың тиімді әдісі. Жоспар бойынша «Жұмыспен қамтудың Жол картасы – 2020» бағдарламасымен бөлінген қаражатқа 98 жоба жүзеге асады. Соның аясында 4 мыңнан аса жұмыс орнын ашу көзделсе, бүгінге дейін жұмыспен қамтылғандар саны 80 процентті құрап отыр.

Атқарылып жатқан ауқымды тірлікті барлап, бағамдап қайтқан ҚР Парламенті Сенатының  депутаты М.Бақтиярұлы өз кезегінде жұмыс сапасына көңіл толатындығын жеткізді.

– «Жұмыспен қамтудың Жол карта­сы – 2020» бағдарламасы аясында инфрақұры­лымды дамыту, әлеуметтік нысандарды жаңарту, елді  мекендерді абаттандыру сынды жұмыстарға республикалық бюджет­тен 1 трлн теңге қаржы қаралды. Соның 36 млрд теңгесі Сыр өңіріне, басым бөлігі қалаға  бөлінген. Осы қаржының мақсатты жұмсалып жатқандығын көзбен көру мақ­сатында бірқатар құрылыс нысанын араладым. Қала әкімі биыл қала, ауыл және шет аймақтағы 280 көшеге күрделі, орташа жөндеу жұмыстары жүргізілетінін айтты. Жалпы, байқағанымдай, қаржының мақсатты жұмсалуы, жұмыстың сапалы жасалуы Сыр өңірінде лайықты көрініс тапқан, –деді ол.