АҒАШ ТАБАҚ
Ағаш табақ – қоңыр түсті, салмағы жеңіл тұрмыстық бұйым. Дөңгелек пішінді ыдыс қарағай ағашынан жона отырып, ойып жасалған. Қадым заманнан қалған бұл жәдігер бүгінде облыстық тарихи-өлкетану музейінің филиалы – «Ақмешіт» музейіндегі құнды экспонаттар қатарынан орын алған. Музей қызметкерлерінің айтуынша, ол ХІХ ғасырдың 20-50-шы жылдарында күнделікті көші-қон тұрмысында кең қолданыста болған. Екі ғасырдан астам уақытты тарих қойнауына жіберген бұйымның бүгінде аздап түсі кете бастаған. Бабаларымыздан қалған мұраның негізгі диаметрі 22 см 5 мм құрайды. Ағаштан сан түрлі әдіспен ойылып жасалған әдемі дүниелерге кезінде кәделі жіліктерді салып, қадірлі меймандарға ұсынған көрінеді. «Қонақ келсе – құт» дейтін қонақжай халқымыз осылайша сыйлы адамдарына сый-сияпат көрсетіп отырған. Данышпан бабаларымыз ағаштан жасалған ыдыстардың пайдалануға тиімді әрі денсаулық үшін пайдасы зор екендігін де ескерсе керек, тұтынатын заттарының басымын табиғи тәсілдермен жасауға аса мән берген. 1984 жылдың маусымында Жаңақорған ауданына қарасты Түгіскен ауылының тұрғыны Жұман Әріповтен музейдің ғылыми қызметкері Гүлшат Ахметова арқылы алынған бұйым осылайша отыз жылға жуық музей қорында көненің көзіндей сақтаулы тұр.
Бағлан ТІЛЕУБЕРГЕНОВА
