Ақмешіт апталығы

         Ал, ерте оянған қалада тіршілік әлдеқашан басталып та кеткен сыңайлы. Әсіресе, көше жиегінде қар күреген әйелдер үшін әтеш айқайламай тұрып таң атқанға ұқсайды. Қыстың аязынан қорғанып, бетіне дейін қалың орамал байлапты. Тек жылтыраған көздері ғана байқалады. Соған қарамастан қатал қыстың "қаһармандары" күректі олай да былай да серпіп, жолды қар құрсауынан арылтуда. Аяқ астында шыпылдаған сулы қарға қарауға да мұрша келер емес. Сонау ұзын-сонар созылған көше бойын мұнтаздай етіп күреп барады. Күрек ұстаған жандардың бұл жұмысқа әбден төселгені көрініп-ақ тұр. Құдды бір қар таситын техникаша соңынан бірде-бір шөкім қар қалдырар емес. Арасында демін бір алып, бел жазып, сәл-пәл аяңдап алады. Құмырсқаша тынбай имеңдеп еңбек етіп жатқан сол бір нәзікжандылардың қара жұмысты да ырқына көндірген қайрат-жігеріне бас имесіңе шара жоқ. Сырттай бақылап тұрып, олардың еңбекқорлығына сүйсіндім.

         – Осы салада келе жатқаныма он шақты жылдың жүзі болды. Жасым 57-де, зейнет жасына да таяп қалдым. Біздің жұмысымыз ауа-райына, мереке, тіпті сенбі, жексенбі күндеріне де қарамайды. Кейде түнгі кезекшілікпен де еңбек ететін кездер болады. Әйтеуір, ай сайынғы еңбекақымызды алғанда осындай шаршаған кезіміз тарс естен шығады. Арасында сыйақы беріп қуантады. Арнаулы киім береді. Жалақымыз жүріп-тұруға, шәй-пұлымызға жетеді. Оған да шүкір. Үйде қол қусырып отырғаннан әлдеқайда жақсы. "Қанағат қарын тойғызады", – деді күрек сабына шынтақтай сүйенген Ғалия Бейсенова есімді апамыз ағынан жарылып.

         Діттеген жерге жеткенше осындай он шақтыдан біріккен жұмысшы әйелдер тобын әр жерден бірнеше мәрте көзім шалды. Расында, қыс маусымында қаланың қарын күреп, тазалығын қамтамасыз ететін «Қызылорда тазалығы» ЖШС үшін қазір нағыз қарбалас кезең. Тынық күндері де серіктестік жұмыскерлері бейғам отырмайды. Мезгілі жеткен күннің алдап соғар тосын мінезіне тас-түйін әзір. Бұған кәсіпорын жұмысымен танысуға арнайы барғанда көз жеткіздік.

         – Ауа райының қолайсыз күндері қала көшелерін мұздақтардан тазалауға тұз араласқан құм қоспасы арнайы дайындалып, серіктестік қоймасында сақталады, – деді "Қызылорда тазалығы" ЖШС директорының өндіріс жөніндегі орынбасары Нұрлан Өтепов сөз басында. Ол кісі бізбен әңгімесінде тәулігіне 24 сағат тынымсыз қызмет ететін мекеменің маусымдық жұмыстағы қызу тірлігін баяндап берді.

          – Инженерлі техникалық бөлім қызметкерлерімен кезекшілік ұйымдастырылады. Олар ауа райы қолайсыздығы салдарынан жол-қатынас байланысындағы кедергілерді болдырмай, жаяу жүргіншілердің қауіпсіздігін арттыру мақсатында мекеме техникаларының уақытылы шығуын қадағалайды. Биыл қар түскелі бері көшелерді мұздақтардан тазарту үшін 150-дей жұмысшы жұмылдырылып, 1000 тоннадан аса қар арнайы полигонға шығарылды. Екі жарым мың тоннадай қоспа себілді. Осындай ыждаһаттылықтың арқасында осы кезге дейін қандай да бір кемшілік немесе төтенше жағдай орын алған жоқ, – деді директор орынбасары.

         Мұндағы жұмысшылардың алғашқы ауысымы таңғы сағат алтыдан басталып кешке дейін жалғасады. Одан кейін келесі ауысым іске кіріседі. Ауа райын болжау қызметі кәсіпорынға мәлімет жібереді екен. Мекеме соған сәйкес қимылдайды. Болжам бойынша қалың қар, ызғырық аяз күтілмесе де, мұндағы әрбір жұмысшы, әрбір техника әрдайым тыңғылықты дайындық үстінде отырады. Ал, жұмыс өнімділігін арттыра түсу мақсатында биылдың өзінде Камаз жүк көлігі, МТ3 тракторы, бульдозер, шағын жүктеуші техникасы, қар тасымалдайтын самосвал Камаз, автобус, эксковатор сынды бірнеше жаңа техника қатары толықтырылған. Қазіргі қыстық маусымда 37 шақты техника жұмылдырылып, қарқынды шаралар жасалуда. Әр көліктің өз міндеті, өз бағыты бар. Бірі қар тасыса, енді бірі артынша жол үстіне қоспа сеуіп отырады. Әнекей, әудемжерде бір-бірін өкшелей қуған көліктер легі тағы да тізбектеле зырғып барады...